मध्यप्रदेश, दि. १२ (पीसीबी) – तब्बल २४ तासानंतर मध्यप्रदेश विधानसभा निवडणुकीचे संपूर्ण निकाल जाहीर झाले आहेत. मध्यप्रदेशात कोणत्याही पक्षाला बहुमत मिळाले नसले तरी काँग्रेसने सर्वाधिक ११४ जागा जिंकल्या आहेत. तर भाजपला केवळ १०९ जगांवर समाधान मानावे लागले आहे. त्यामुळे त्रिशंकू परिस्थिती निर्माण झालेल्या मध्यप्रदेशात सत्ता स्थापन करण्यासाठी काँग्रेसला इतर पक्षांची किंवा अपक्षांची मदत घ्यावी लागणार आहे.
मंगळवारी सकाळी ८ वाजता मध्यप्रदेशातील २३० जागांची मतमोजणी सुरू झाली होती. आज पहाटे पर्यंत ही मतमोजणी सुरूच होती. प्रत्येक फेरीत कधी काँग्रेस तर कधी भाजप आघाडी घेत असल्याने मध्यप्रदेशात कोण बाजी मारणार? याकडे सर्वांचेच लक्ष लागले होते. अखेर २४ तासानंतर मध्यप्रदेशातील सर्व जागांचे निकाल हाती आले असून काँग्रेसने ११४, भाजपने १०९, बसपा २, सपा १ आणि अपक्षांनी ४ जागा जिंकल्या आहेत. मध्यप्रदेशात बहुमतासाठी ११६ जागांची आवश्यकता असून कोणत्याच पक्षाला हा आकडा गाठता आलेला नाही. बहुमतासाठी काँग्रेसला अवघ्या दोन जागांची गरज असल्याने काँग्रेस सत्तेसाठी कुणाला जवळ करणार? याकडे संपूर्ण देशाचे लक्ष लागले आहे.
