पिंपरी, दि. १० (पीसीबी) – भोसरी विधानसभा मतदारसंघातील दिघी, वडमुखवाडी आणि मोशी परिसरात संरक्षण विभागाच्या हद्दीत येणाऱ्या अनेक जमीनींची गुंठेवारी करून राजरोसपणे विक्री सुरू आहे. ही जागा विकत घेणाऱ्या नागरिकांची फसवणूक होत आहे. त्यामुळे अशा जागा नागरिकांनी विकत घेऊन स्वतःची फसवणूक करून घेऊ नये आणि विकणाऱ्यांनीही ती विकू नये, असे आवाहन पिंपरी-चिंचवड महापालिकेच्या वतीने करण्यात आले आहे. अशा प्रकारचे आवाहन करून महापालिकेने नागरिकांमध्ये जनजागृती करण्याचा प्रयत्न केला असला, तरी अशा जागा विकून नागरिकांची फसवणूक करणाऱ्यांविरोधात फौजदारी कारवाईचे धाडस प्रशासनाकडून दाखवले जात नाही. प्रत्येक गोष्टीत सर्वसामान्यांना नियम सांगितले जात असताना दुसरीकडे संरक्षण विभागाच्या हद्दीतील प्लॉटिंगबाबत मात्र दुटप्पी आणि बोटचेपी भूमिका घेतली जात असल्याने नागरिकांचा महापालिका प्रशासनावरचा विश्वास उडत चालला आहे.