पिंपरी, दि. ११ (पीसीबी) – आगामी विधानसभा निवडणुकीपूर्वी शिवसेना पिंपरी-चिंचवड शहरात मोठा राजकीय भूकंप करण्याची शक्यता वर्तविली जात आहे. शिवसेना नेते आणि पिंपरी-चिंचवडची जबाबदारी असलेले खासदार संजय राऊत यांनी गेल्या आठवड्यात मावळसह शहरातील तीनही विधानसभा मतदारसंघांचा आढावा घेतला. या आढावा बैठकीनंतर त्यांनी शहरात एक खासगी बैठक घेतल्याची चर्चा राजकीय वर्तुळात आहे. या खासगी बैठकीबाबत कमालीची गुप्तता पाळण्यात आली असून, शहर शिवसेनेतील पदाधिकाऱ्यांनाही त्याची माहिती देण्यात आली नाही. त्यामुळे खासदार राऊत यांनी ही खासगी बैठक कोणासोबत घेतली, याबाबत कमालीची उत्सुकता निर्माण झाली आहे. दरम्यान, भोसरी आणि पिंपरी विधानसभा मतदारसंघात शिवसेनेकडे भाजप आणि राष्ट्रवादीच्या तोडीस तोड उमेदवार नाही. त्यामुळे या दोन्ही मतदारसंघांसाठी अन्य राजकीय पक्षातील मोठे मासे गळाला लावण्याचा शिवसेनेचा प्रयत्न असल्याचे समजते.
Home Notifications भोसरी आणि पिंपरी मतदारसंघात शिवसेनेकडून राजकीय भूकंपाची शक्यता; खासदार संजय राऊतांची गुप्त...