पिंपरी, दि. ८ (पीसीबी) – गेल्या पाच वर्षांत आमचा मित्र पक्ष भाजप आणि या पक्षाचे शहराध्यक्ष व आमदार लक्ष्मण जगताप यांच्यावर आजपर्यंत केलेले सर्व आरोप बिनबुडाचे आणि निराधार होते. राजकीय हेतूने मी हे आरोप केले होते, अशी कबुली शिवसेना खासदार श्रीरंग बारणे यांनी पत्रकार परिषदेत सोमवारी (दि. ८) दिली. महापालिकेच्या कारभारावरही मी राजकीय हेतूनेच टिका केली होती. भाजप हा आमचा मित्र पक्ष असल्यामुळे यापुढील काळात आम्ही सर्वजण एकदिलाने काम करू. आमच्यात कोणतेही मतभेद होणार नाहीत, याची मी पुरेपूर काळजी घेईन. तसेच आमदार लक्ष्मण जगताप व भाजप पदाधिकाऱ्यांना विश्वासात घेऊनच यापुढील माझी वाटचाल राहिल, अशी ग्वाही बारणे यांनी दिली.