बिहारमध्ये शौचालयाच्या टाकीत गुदमरून एकाच कुटुंबातील सहा जणांचा दुर्देवी मृत्यू

0
1252

जीतपुर, दि. १० (पीसीबी) – शौचालयाच्या टाकीत गुदमरून एकाच कुटुंबातील सहा जणांचा दुर्देवी मृत्यू झाल्याची धक्कादायक घटना समोर आली आहे. ही घटना बिहारमधील पूर्वी चंपारणच्या जीतपुर गांवामध्ये  गुरूवारी (दि.९) सकाळच्या सुमारास  घडली.

दिनेश महतो, बचाणी देवी,  मोहन महतो, वसंत, सचिन,  सरोज मुखिया असे गुदमरुन मृत्यू झालेल्या एकाच कुटूंबातील सहा जणांची नावे आहेत. जिल्हाधिकारी आणि पोलिसांनी पंचनामा केल्यानंतर आज हे प्रकरण समोर आले आहे.

पोलिसांनी दिलेल्या माहितीनुसार, दिनेश महतो यांच्या घरी शौचालयाची नवीन टाकी बसवण्यात आली होती. सकाळी त्यांचा मुलगा मोहन महतो टाकीचे शटर उघडण्यासाठी आत उतरला. पण, २० मिनीट झाले तरी तो बाहेर आला नाही. हे पाहून दिनेश महतोही टाकीमध्ये उतरले. वडिल-मुलगा दोघेही टाकीत अडकले. खूपवेळ झालेतरी नवरा आणि मुलगा बाहेर न आल्याचे पाहून दिनेशची पत्नीही आत उतरली. पण दुर्देव ऐवढे की तिही आतच अडकली. तिघे आतमध्ये अडकले त्यांना बाहेर काढण्यासाठी त्यावेळी दिनेश यांचा दुसरा मुलगा वसंतही आत उतरला आणि तोही टाकीमध्ये अडकला. चारही सदस्य अडकल्याचे पाहून कुटुंबात गोंधळ आणि भितीचे वातावरण निर्माण झाले. या चार जणांना वाचवण्यासाठी दिनेश यांचा पुतण्या सचिन आणि सरोज मुखिया आतमध्ये उतरले. शौचालयाच्या टाकीमध्ये ऑक्सिजनची कमी असल्यामुळे गुदमरून चार जणांनी जागेवरच दम तोडला. या दुर्घेटनेची माहिती मिळाताच गावकऱ्यांनी सर्वांना बाहेर काढले. तात्काळ दोन जणांना रूग्णालयात दाखल केले. पण उपचारादरम्यान दोघांचाही मृत्यू झाला.