मुंबई, दि, ३० (पीसीबी) – चेक बाऊन्स प्रकरणी गेल्या महिन्यात बिग बॉसच्या सेटवरुन गायब झालेला अभिजीत बिचुकले बिग बॉस मराठीच्या घरात परतणार की नाही… तो परत येणार तर केव्हा येणार असे अनेक प्रश्न प्रेक्षकांना पडले होते. या प्रश्नाला कालच्या म्हणजेच सोमवारच्या भागात उत्तर मिळाले. बिचुकलेची पुन्हा एकदा दमदार एन्ट्री झाली असून घरातील सदस्यांना एकच धक्का बसला आहे.
शिवानी सुर्वे आणि पराग कान्हरे यांच्यानंतर बिग बॉसच्या दुसऱ्या सीजनमध्ये बिग बॉसच्या घरात री-एन्ट्री करणारा बिचुकले हा तिसरा स्पर्धक ठरला आहे.२१ जून रोजी चेक बाऊन्स प्रकरणी बिचुकलेला अटक करण्यात आली होती. त्यानंतर खंडणी, मारहाण अशी वेगवेगळी प्रकरणे एकापाठोपाठ एक बाहेर येऊ लागल्याने त्याला जवजवळ महिनाभर तुरुंगात राहावे लागले. परंतु, या सर्व प्रकरणांतून जामीन मिळाल्याने त्याची पुन्हा एकदा एन्ट्री झाली आहे.
बिचुकले पुन्हा एकदा घरात आला असला तरी तो स्पर्धक म्हणून आहे की, पाहुणा सदस्य याबद्दल खुलासा करण्यात आला नाही. बिग बॉस त्याला सदस्यत्वाचा दर्जा देतात का? घरातील समीकरणे आता पुन्हा बदलणार का? हे पाहणे उत्सुकतेचे ठरणार आहे.
