बारामती मतदारसंघातील महायुतीच्या उमेदवार कांचन कुल यांच्याबद्दल व्हॉट्सअप ग्रुपवर अश्लील व आक्षेपार्ह मजकूर

0
1070

इंदापूर, दि. १६ (पीसीबी) – बारामती लोकसभा मतदारसंघातील महायुतीच्या उमेदवार कांचन कुल यांच्याबद्दल मोबाईल व्हाट्सअप स्टेटसवर अश्लील आक्षेपार्ह बदनामीकारक मजकूर ठेवून तो व्हॉट्सअप ग्रूपवर व्हायरल करून अवमान केल्याप्रकरणी इंदापूर तालुक्यातील एका युवकावर गुन्हा दाखल करण्यात आला आहे.

ज्ञानदेव नारायण ताकवणे (रा. पारगाव ता. दौंड ) यांच्या तक्रारीवरुन सागर पंजाब बागल वय २१ वर्ष रा. पिंपळे ता. इंदापूर याच्यावर भिगवण पोलीस ठाण्यात माहिती तंत्रज्ञान अधिनियम कलम ६७ प्रमाणे गुन्हा दाखल करण्यात आला आहे. सोमवारी सायंकाळी सहाच्या सुमारास वाबळे याने कांचन कुल यांच्याविषयी व्हॉट्सअप स्टेट्सवर अश्लील आक्षेपार्ह मजकूर ठेवून त्याने इतर मित्रांना व इतर व्हॉट्सअप ग्रूपवर व्हायरल केला. ही बाब भाजप तालुकाध्यक्ष नानासाहेब शेंडे व उपाध्यक्ष ज्ञानेश्वर मारकड यांच्या निदर्शनास आल्यानंतर त्यांनी पोलिसांना हा प्रकार सांगितला. सोमवारी उशीरा रात्री गुन्हा दाखल करण्यात आला. भिगवण पोलीस अधिक तपास करीत आहेत.