‘फटाक्यांच्या कंपनीला अचानक लागली आग आणि….’

थेरगाव, दि. २६ (पीसीबी) – योग्य प्रकारे खबरदारी न घेतल्याने थेरगाव येथे पी. के. मेटल्स या कंपनीत स्फोट होऊन आग लागली. याप्रकरणी तीन जणांवर गुन्हा दाखल करण्यात आला आहे. ही आगीची घटना शनिवारी (दि. 24) दुपारी सव्वातीन वाजताच्या सुमारास थेरगाव येथे घडली.

तेजिंदरकौर प्रितपालसिंग कंधारी (वय 65), प्रितपालसिंग कंधारी (वय 70, दोघेही रा. बाणेर, पुणे) आणि पी. के. मेटल्सचे व्यवस्थापक अशी गुन्हा दाखल झालेल्या आरोपींची नावे आहेत. पोलीस कर्मचारी ज्ञानेश्‍वर पोपट कौलगे यांनी रविवारी (दि. 25) याबाबत वाकड पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, शनिवारी (दि. 24) दुपारी सव्वा तीन वाजताच्या सुमारास थेरगाव येथील पी. के. मेटल्स या कंपनीत ज्वलनशील पदार्थांचा स्फोट होऊन आग लागली. ही कंपनी रहिवासी भागात असून याठिकाणी सुरक्षिततेबाबत कोणतीही काळजी घेण्यात आलेली नव्हती. पी. के. मेटल्स कंपनीच्या निष्काळजीपणामुळे मानवी जिवितास धोका निर्माण झाला. तसेच आसपासच्या दुकानांचे स्फोट आणि आगीमुळे नुकसान झाल्याचे फिर्यादी म्हटले आहे. वाकड पोलीस तपास करीत आहेत.