पिंपरी, दि. 19 (पीसीबी) – पोलीस उपनिरीक्षक महिलेसोबत पोलीस शिपायाचे प्रेमसंबंध असताना त्यांच्यात झालेल्या अंतर्गत वादातून पोलीस शिपायाने पोलीस ठाण्याच्या इमारतीवरून उडी मारून आत्महत्या करण्याचा प्रयत्न केला. हा प्रकार दिघी पोलीस ठाण्यात एक जानेवारी रोजी घडला. याबाबत तब्बल 18 दिवसानंतर गुन्हा दाखल करण्यात आला आहे.
अनिल संपत निरवणे असे आत्महत्येचा प्रयत्न केलेल्या पोलीस शिपायाचे नाव आहे. याबाबत पोलीस उपनिरीक्षक अशोक तरंगे यांनी दिघी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, पोलीस शिपाई निरवणे दिघी पोलीस ठाण्यात कार्यरत आहेत. त्यांचे एका पोलीस उपनिरीक्षक महिलेसोबत मागील दीड वर्षांपासून प्रेमसंबंध होते. दरम्यान, त्यांच्यात अंतर्गत वादविवाद झाले. त्यातून चिडून निरवणे यांनी संबंधित उपनिरीक्षक महिलेला जीवे मारण्याची धमकी दिली. तसेच स्वतःच्या जीवाचे बरेवाईट करून घेण्याची धमकी देत दिघी पोलीस ठाण्याच्या इमारतीवरून उडी मारून आत्महत्या करण्याचा प्रयत्न केला.
ही घटना एक जानेवारी रोजी घडली असून याबाबत 18 जानेवारी रोजी गुन्हा दाखल करण्यात आला आहे. सहाय्यक पोलीस निरीक्षक खटाळ तपास करीत आहेत.
