पुणे, दि.२१ (पीसीबी) : व्यावसायिक प्रकल्पातील एक ऑफीस मोफत द्या किंवा ५० लाख रुपये खंडणी मागून पैसे न दिल्यास बदनामी करुन वाट लावून टाकीन अशी धमकी प्रसिद्ध उद्योगपतीला दिली. तसेच जबरदस्तीने फ्लॅटचा ताबा घेतल्याचा धक्कादायक प्रकार समोरआला आहे.
याप्रकरणी 59 वर्षीय उद्योगपतीने फिर्याद दिली आहे. त्यावरुन शिवाजीनगर पोलिसांनी राजेश ऊर्फ बॉबी खैरातीलाल बजाज (रा. डेक्कन जिमखाना) आणि बापू गोरख शिंदे (रा. मानाजीनगर, नर्‍हे रोड) यांच्याविरुद्ध गुन्हा दाखल केला आहे. हा प्रकार डिसेंबर 2019 ते 16 सप्टेंबर 2021 दरम्यान घडला आहे.
राजेश बजाज हा स्वत:ला सामाजिक कार्यकर्ता, माहिती अधिकार कार्यकर्ता म्हणवून घेतो. याबाबत उद्योगपतीने दिलेल्या फिर्यादीनुसार, राजेश बजाज याने वकिलीची सनद नसताना बनावट ओळखपत्र तयार करुन सांकला यांचे वकील पत्र पी एम सी येथील दिवाणी न्यायालयात दाखल केले. त्यांच्याकडून 9 लाख 90 हजार रुपये वकिली फी म्हणून घेऊन त्यांचा विश्वासघात केला. हा प्रकार समोर आल्यानंतर सांकला यांनी त्यांना जाब विचारला. त्यानंतर राजेश बजाज व बापू शिंदे यांनी संगनमत करुन बापू शिंदे याने 93 एव्हेन्यू या व्यावसायिक प्रकल्पातील एक ऑफीस मोफत द्या किंवा रोख 50 लाख रुपये द्यावे लागतील, अशी खंडणीची मागणी केली.
खंडणी न दिल्यास वानवडी येथीलबांधलेला प्रकल्प बेकायदेशीरपणे बांधलेला आहे. त्याबाबत पोलीस व इतर ठिकाणी तक्रार करुन तुमची बदनामी करुन वाट लावून टाकीन. तुम्हास कधी संपवून टाकेन अशी धमकी दिली. राजेश बजाज याने अनेकांची यापूर्वी बनावट कागदपत्रांद्वारे फसवणूक केली आहे. प्रसिद्ध बांधकाम व्यावसायिक अविनाश भोसले यांनी राजेश बजाज याच्याविरुद्ध 400 कोटी रुपयांचा बदनामीचा दावा दाखल करणार असल्याचे जाहीर केले होते. याशिवाय एका बांधकाम व्यावसायिकाची फसवणूक केल्याप्रकरणी गुन्हे शाखेने राजेश बजाज याला यापूर्वी अटक केली होती.