पिंपरी, दि. ३१ (पीसीबी) – पिंपरी-चिंचवड शहरासाठी पवना, आंद्रा आणि भामा-आसखेड या तीन धरणातील सुमारे १४९ दशलक्ष घनमीटर पाण्याचा कोटा मंजूर झाला आहे. हे आरक्षित पाणी शहरात आणण्यासाठी सत्ताधारी भाजपने हालचाली गतिमान केल्या आहेत. या पाण्याच्या मोबदल्यात सिंचन पुनर्स्थापना आणि पुनर्वसन खर्चापोटी राज्य सरकारला तातडीने ४५ कोटी रुपये दिले जाणार आहेत. अर्थसंकल्पात शहराच्या अन्य विकासकामांसाठी तरतूद रक्कमेतून ४५ कोटी रुपये वर्गीकरणास सर्वसाधारण सभेत बुधवारी (दि. ३१) मंजुरी देण्यात आली. ही रक्कम तातडीने जलसंपदा खात्याकडे जमा करून पवना, आंद्रा आणि भामा-आसखेड या तीन धरणातील शहरासाठी आरक्षित पाणी आणण्याची कार्यवाही गतीने करण्याची प्रशासनाला सूचना करण्यात आल्याचे भाजप शहराध्यक्ष व आमदार लक्ष्मण जगताप यांनी सांगितले.