– आमदार महेशदादा लांडगे यांची आग्रही मागणी
पिंपरी, दि.11 (पीसीबी): पिंपरी-चिंचवड महापालिका ही आशिया खंडातील सर्वाधिक विकसीनशील महापालिका आहे. शहराचा नावलौकिक आणि विकासामध्ये इथल्या प्रत्येक नागरिकांचे योगदान आहे. त्यामुळे शहरवासीयांच्या आरोग्याची काळजी घेणे आणि सुरक्षा देणे हे आपले कर्तव्य आणि जबाबदारी आहे. त्यामुळे सर्वस्तरातील नागरिकांना कोरोना प्रतिबंधक लस मोफत आणि प्राधान्यक्रमाने मिळाली पाहिजे.
यासंदर्भात महापालिकेतील सर्वपक्षीय गटनेते, संबंधित विभागाचे अधिकारी आणि पदाधिकारी यांची तत्काळ बैठक आयोजित करावी, अशी आग्रही मागणी आमदार महेशदादा लांडगे यांनी केली आहे. त्याबाबत महापालिका आयुक्त श्रावण हर्डीकर यांना एक पत्र देऊन सविस्तर चर्चा आमदार लांडगे यानी केली.
आपल्या पत्रात आमदार लांडगे म्हणतात,
कोरोना विषाणुच्या पार्श्वभूमीवर जगभरात सहा ते सात ठिकाणी कोरोना प्रतिबंधक लसचे उत्पादन सुरू आहे. केंद्र आणि राज्य सरकार लसीकरणाबाबत त्या – त्या स्तरावर नियोजन करीत आहे. मात्र, शहरातील लोकप्रतिनिधी या नात्याने केंद्र आणि राज्य सरकारवरच्या धर्तीवर महापालिका स्तरावर मोफत लसीकरणाबाबत आग्रही आहोत. कारण, केंद्र अथवा राज्य सरकारच्या नियोजनाप्रमाणे कदाचित शहरातील नागरिकांना उशीरा प्राधान्यक्रम मिळू शकतो. त्यामुळे पुणे, हैदाबाद, रशिया, इटलीसह अन्य उत्पादन करणाऱ्या जगभरातील कंपन्यांशी चर्चा केली पाहिजे.
शहराची लोकसंख्या सुमारे २७ ते ३० लाखांच्या घरात आहे. त्यादृष्टीने लसीकरण मोहिमेचे सूक्ष्म नियोजन मनपा स्तरावर करावे लागणार आहे. कोरोनाच्या दुसऱ्या लाटेचा सामना करण्याकरिता तसेच नागरिकांचे आरोग्याचे हित लक्षात घेता आगामी अर्थसंकल्पामध्ये (२०२१-२२) तरतूद करून महापालिकेच्या रुग्णालयामध्ये प्रभागस्तरावर मोफत लस उपलब्ध करून देण्यात यावी.
‘कॉमन मिनिमम प्रोग्राम’ तयार करावा…
शहरातील सर्वपक्षीय लोकप्रतिनिधी, नगरसेवक, स्वयंसेवी संस्था-संघटनांचे प्रतिनिधी यांना विश्वासात घेवून मोफत लसीकरणाबाबत ‘कॉमन मिनिमन प्रोग्राम’ तयार करावा. त्याची प्रभावीपणे अंमलबजावणी करावी. शहराची लोकसंख्या आणि लसीची अंदाजे किंमत याचा विचार करता सुमारे २५० ते ३०० कोटी रुपयांचा खर्च अपेक्षीत आहे. त्यासंदर्भात आवश्यक तरतूद आणि यंत्रणा आतापासून उभी करावी. प्रशासन आणि लोकप्रतिनिधी लस उपलब्धता, प्रभागस्तरावर वितरण याबाबत नियोजन करावे. जगभरातील लस उत्पादक कंपन्यांनी समन्वय करुन २७ ते ३० लाख लसची बुकिंग करावी. तसेच, कोरोना योद्धा, ज्येष्ठ नागरिक, शिक्षक, लहान मुले तसेच वय आणि आजारानुसार लसीकरण अशा प्राधान्यक्रमाने लसीकरण मोहीमेचे नियोजन करावे. या मोहीमेबाबत प्रत्येक आठवड्याला आढावा बैठक घ्यावी, अशी सुचना आमदार लांडगे यानी केली आहे.
