पिंपरी, दि. १५ (पीसीबी) – मावळ मतदारसंघात अजितदादांनी विजयाच्या खात्रीने स्वतःच्या पुत्राला निवडणूक रिंगणात उतरवले असले तरी प्रत्यक्षात आता वेगळेच चित्र उभे राहिले आहे. राष्ट्रवादीच्या प्रचार यंत्रणेत ढिसाळपणा दिसून येत आहे. नियोजनाअभावी कोणाचा कोणाला पायपोस राहिला नसून, नगरसेवक आणि प्रमुख पदाधिकाऱ्यांना विश्वासात घेतले जात नाही. आताच ही परिस्थिती असेल, तर उद्या पार्थ पवार निवडून आल्यानंतर आपली काय अवस्था होईल या विचाराने नगरसेवक व पदाधिकारी चिंतेत आहेत. परिणामी हे सर्वजण पक्षाचा प्रचार मनापासून करतात की नाही याबाबत शंका उपस्थित व्हावी, अशी स्थिती आहे. पार्थ पवार हे बाहेरचे असल्याने त्यांना निवडून द्यावे की नाही याबाबतही नगरसेवक व पदाधिकाऱ्यांमध्ये अजूनही संभ्रम असल्याचे चित्र आहे. त्यामुळे हे सर्वजण शेवटच्या क्षणी आपले “काम दाखवतील”, अशी चर्चा राजकीय वर्तुळात आहे.
