मुंबई, दि. ८ (पीसीबी) – ‘लक्षात ठेवा मुंबई आणि महाराष्ट्र उत्तर भारतीय चालवतात… जर फक्त एक दिवस उत्तर भारतीयांनी काम केले नाही तर मुंबई ठप्प होईल’ असे वादग्रस्त वक्तव्य करणारे काँग्रेसचे मुंबई अध्यक्ष संजय निरुपम यांच्याविरोधात महाराष्ट्र नवनिर्माण सेनेने आक्रमक पवित्रा घेतला आहे. मनसेकडून सोशल मीडियावर निरुपमांविरोधात जोरदार पोस्टरबाजी सुरू आहे. या पोस्टरमध्ये निरुपमांना थेट भटका कुत्रा म्हणण्यात आले आहे.
संजय निरुपम यांच्याविरोधातील ही पोस्टरबाजी सोशल मीडियावर तुफान व्हायरल झाली आहे. या पोस्टरमध्ये संजय निरुपमांना परप्रांतीय भटका कुत्रा असे म्हणण्यात आले आहे. शिवाय, पोस्टरवर एका कुत्र्याला निरुपमांचा चेहराही लावण्यात आला. संजय निरुपम म्हणजे परप्रांतीय भटका कुत्रा असून परप्रांतीय मतांवर त्यांचा डोळा आहे असे विधान या पोस्टरच्या माध्यमातून करण्यात आले. संजय निरुपम यांच्या वादग्रस्त विधानानंतर मनसेकडून सोशल मीडियावर व्हायरल झालेल्या या वादग्रस्त पोस्टरमुळे परिस्थिती अधिक चिघळण्याची शक्यता आहे.
नागपूर येथे उत्तर भारतीयांच्या वार्षिक सभेत बोलताना निरुपम यांनी हे विधान केले होते. ‘उत्तर भारतातून महाराष्ट्रात आलेला माणूस सर्व कामे करतो. तुम्ही कोणतेही क्षेत्र सांगा. त्यामध्ये उत्तर भारतीय सक्रीय आहेत. उत्तर भारतीय माणूस रिक्षा-टॅक्सी चालवतो. फळं-भाजी विकतो. बांधकाम क्षेत्रातील बहुतांश मजूर हे उत्तर भारतीय आहेत. सर्व क्षेत्रांमध्ये उत्तर भारतीयांचं प्रमाण लक्षणीय आहे,’ असे निरुपम म्हणाले. संपूर्ण महाराष्ट्र उत्तर भारतातील मंडळीच चालवतात, असा दावादेखील त्यांनी केला. ‘उत्तर भारतीय पूर्ण मुंबई चालवतात. त्यांनी जर ठरवले, तर मुंबई ठप्प होऊ शकते. जर फक्त एक दिवस उत्तर भारतीयांनी ठरवले, तर मुंबईकारांना जेवायला मिळणार नाही,’ असे निरुपम म्हणाले होते. त्यामुळे आम्हाला काम बंद करायला भाग पडू नका, असा इशाराही त्यांनी दिला होता.
