नवी दिल्ली, दि. ८ (पीसीबी) – पंजाब नॅशनल बँकेला (पीएनबी) १४ हजार कोटींचा चुना लावून लंडनमध्ये पळून गेलेला हिरे व्यापारी नीरव मोदीची ३३० कोटीची संपत्ती सक्तवसुली संचलनालयाने जप्त केली आहे. यामध्ये मुंबई, लंडन आणि संयुक्त अरब अमिरातीमधील आलिशान फ्लॅटचा समावेश आहे. फरार आर्थिक गुन्हेगार कायद्यातंर्गत ही कारवाई करण्यात आली आहे. ईडीने यापूर्वी नीरव मोदीची २,३४८ कोटींची संपत्ती जप्त केली आहे. मुंबईच्या वरळी भागातील समुद्र महाल येथील फ्लॅट, अलिबागमध्ये समुद्र किनाऱ्यावरील फार्म हाऊस, राजस्थान जैसलमेरमधील मॉल, लंडन-यूएईमधील फ्लॅटस ताज्या कारवाईमध्ये जप्त करण्यात आले आहेत.
यापूर्वी २ हजार ३०० किलो सोनं भारतात आणलं
सक्तवसुली संचलनालयानं नीरव मोदी आणि मेहुल चोक्सीशी संबंधित कंपन्यांमधील तब्बल २ हजार ३०० किलोपेक्षा अधिक सोनं भारतात आणलं आहे. अधिकाऱ्यांनी दिलेल्या माहितीप्रमाणे, त्याची किंमत १ हजार ३५० कोटी रूपयांच्या जवळपास आहे. यामध्ये पॉलिश्ड डायमंड, पर्ल आणि सिल्व्हर ज्वेलरीचा समावेश असल्याचं अधिकाऱ्यांकडून सांगण्यात आलं. हे सर्व हाँगकाँगमधील एका लॉजिस्टिक कंपनीच्या गोदामात ठेवण्यात आली होती. मुंबईमध्ये आलेल्या १०८ कंसायमेंट्सपैकी ३२ हे नीरव मोदीद्वारे चालवण्यात येणाऱ्या कंपन्यांचे आहेत. तर उर्वरित हे मेहुल चोक्सीच्या कंपनीचे आहेत.
अधिकाऱ्यांनी दिलेल्या माहितीनुसार हे कंसायमेंट्स आता पीएमएलए अंतर्गत अधिकृतरित्या जप्त करण्यात येणार आहे. तसंच ईडीनं हाँगकाँगमधील सर्व कायदेशीर प्रक्रियाही पूर्ण केल्या आहेत. त्यानंतर ही ज्वेलरी भारतात आणण्यात आली आहे.
