पुणे, दि.२७ (पीसीबी) – संत निरंकारी मिशनच्या प्रमुख, सद्गुरु माता सुदीक्षाजी महाराज यांच्या पावन सान्निध्यात मंगळवार, दिनांक २८ जानेवारी, २०२० रोजी सायंकाळी ५.०० ते रात्री ८.३० या वेळात महालक्ष्मी लॉन्स, खांदवे नगर, जकात नाका समोर, नगर रोड, वाघोली, पुणे-४७ येथे विशाल निरंकारी संत समागमाचे आयोजन करण्यात आले आहे.
ज्ञात असावे की, सद्गुरु माता सुदीक्षाजी महाराज सध्या महाराष्ट्राच्या कल्याण यात्रेवर असून नुकताच दिनांक २४, २५ व २६ जानेवारी, २०२० रोजी त्यांच्या पावन सान्निध्यात महाराष्ट्राचा ५३वा वार्षिक निरंकारी संत समागम नाशिक येथे मोठ्या हर्षोल्हासाच्या वातावरणात संपन्न झाला. या संत समागमानंतर लगेचच सद्गुरु माताजींनी पुणे शहरामध्ये संत समागमासाठी वेळ दिल्याने संपूर्ण जिल्हा आणि आजुबाजुच्या परिसरातील निरंकारी भक्तगण तसेच प्रभुप्रेमी भाविकांमध्ये उत्साहाचे वातावरण निर्माण झाले आहे.
या संत समागमामध्ये संपूर्ण पुणे जिल्हा आणि आजुबाजुच्या जिल्ह्यांतून हजारोंच्या संख्येने निरंकारी भक्तगण सहभागी होणार आहेत. आध्यात्मिक जागृतीच्या माध्यमातून जगामध्ये मानवता, विश्वबंधुत्व आणि शांतीसुखाचे वातावरण स्थापित करणारा मिशनचा सत्य, प्रेम व एकात्मतेचा संदेश जनसामान्यांपर्यंत पोचविणे हा या संत समागमाचा उद्देश आहे. संत समागमामध्ये मिशनमधील विद्वान वक्ते आपले अनुभवसंपन्न विचार, भक्तीरचना आणि कवितांच्या माध्यमातून आपले भाव व्यक्त करतील. पुणेकरांसाठी ही एक आध्यात्मिक पर्वणी असून प्रभुप्रेमी भाविकांनी या संत समागमाचा अवश्य लाभ घ्यावा असे आयोजकांकडून आवाहन करण्यात आले आहे.
