मुंबई, दि.२९ (पीसीबी) – जेष्ठ अभिनेते नाना पाटेकर यांनी गैरवर्तन केल्याबाबतचा खळबळजनक आरोप बॉलिवूड अभिनेत्री तनुश्री दत्ता हिने एका मुलाखतीत केला. त्यानंतर इंडस्ट्रीमधील सर्व कलाकारांमध्ये या विषयाची चांगलीच चर्चा सुरू झाली. सन २००८ मध्ये ‘हॉर्न ओके प्लीज’ चित्रपटाच्या सेटवर तिच्यासोबत गैरवर्तन केल्याचे तीचे म्हणणे आहे.
आरोपाबाबत तनुश्रीवर कायदेशीर नोटीस बजावण्यात आली आहे. तिच्याकडून लेखी स्वरूपात माफीनामा लागेल. आम्ही सर्व आरोप फेटाळले आहेत. बाकी इतर सामान्य कलम आम्ही नोटीसमध्ये बजावले आहे’, असे नाना पाटेकर यांचे वकील राजेंद्र शिरोडकर यांनी सांगितले.
दहा वर्षांपूर्वी चित्रपटाच्या सेटवर असभ्य वर्तन केल्याचे खोटे आरोप नानांवर तनुश्रीने केले होते. या संपूर्ण घटनेची सोशल मीडियावर बॉलिवूड कलाकारांमध्ये चर्चा झाली. प्रियांका चोप्रा, फरहान अख्तर, सोनम कपूर, परिणिती चोप्रा, रिचा चड्ढा, स्वरा भास्कर आणि ट्विंकल खन्ना यांच्यासह इतर काही कलाकारांनी तनुश्रीच्या खुलेपणाने बोलण्याचे कौतुक करत तिला आपला पाठिंबा दर्शवला. तर, अभिनेता सलमान खानने अलीकडेच एका कार्यक्रमात या विषयावर बोलण्याबाबत नकार दिला. ‘माहीत नसलेल्या विषयांवर आपण न बोललेलेच बरे असते’, असे म्हणत त्याने या विषयावर बोलणे टाळले.
