जेजुरी, दि. २४ (पीसीबी) : कोरोना व्हायरसमुळे महाराष्ट्रात सध्या लॉकडाऊन सुरू आहे. लॉकडाऊनच्या या काळात खंडोबाच्या दर्शनासाठी येणाऱ्या नवविवाहित जोडप्यांवर कारवाई होणार आहे. या जोडप्यांची गाडी जप्त करण्याचा इशारा पोलिसांनी दिला आहे. राज्याच्या वेगवेगळ्या भागांमधून काही भाविक आणि नवविवाहित जोडपी खाजगी वाहनांनी जेजुरीला येत असल्यामुळे पोलिसांनी हा निर्णय घेतला आहे. कोरोना व्हायरसचा प्रादुर्भाव रोखण्यासाठी संपूर्ण देशातील देवस्थानं बंद करण्यात आली आहेत. खंडोबा मंदिर आणि पायरी मार्ग बंद असतानाही काही भाविक आणि नव दाम्पत्य पहिल्या पायरीचं दर्शन घेण्यासाठी जेजुरीला येत आहेत. यात रेड झोनमधल्या भाविकांचाही समावेश आहे. त्यामुळे जेजुरीच्या नागरिकांमध्ये भीतीचं वातावरण निर्माण झालं आहे. यापुढे दर्शनाला येणाऱ्या भाविकांचं वाहन जप्त केलं जाईल आणि अशा व्यक्तींवर गुन्हा दाखल करण्यात येईल, असं पोलिसांनी सांगितलं आहे.
दरम्यान, पोलिसांच्या या भुमिकेवर भाविकांनी नाराजी व्यक्त केली आहे. लग्न साधेपणाने केले तरी कुलाचार म्हणून कुलदैवताचे दर्शन आवश्यक असते. कुलदैवताच्या दर्शनाला काही अटीशर्थींवर परवानगी मिळावी अशी भक्तांची मागणी आहे.
