नवी दिल्ली, दि. २ (पीसीबी) – तेलंगणात भाजपची सत्ता आल्यास एमआयएम पक्षाचे सर्वेसर्वा असदुद्दीन ओवेसींना हैदराबादमधून पळवून लावू, असे उत्तर प्रदेशचे मुख्यमंत्री योगी आदित्यनाथ यांनी म्हटले आहे. तेलंगणा विधानसभा निवडणुकीच्या प्रचारसभेत ते बोलत होते. योगींच्या या वक्तव्यांवर ओवेसी काय उत्तर देणार याकडे सर्वांच्या नजरा लागल्या आहेत.
तेलंगणा विधानसभा निवडणुकीच्या प्रचारात सर्वच पक्षांच्या नेत्यांकडून एकमेकांवर आरोप प्रत्यारोप सुरुच आहे. योगी आदित्यनाथ विकारपुरमधील तंदूर येथे प्रचारसभेला संबोधित करत होते. त्यावेळी त्यांनी एमआयएम अध्यक्ष खासदार असदुद्दीन ओवेसींवर हल्लाबोल केला. तेलंगाणात जर भाजपची सत्ता आली तर हैदराबादच्या निजामाला जसे पळवून लावले होते, तसे ओवेसींना हैदराबादमधून पळवून लावू, असे योगी म्हणाले.
माझे उत्तर ऐकण्यासाठी रात्री ७ ते १० वाजता होणाऱ्या सभेतील माझे भाषण योगींनी ऐकावे, असे ट्वीट योगींच्या वक्तव्यानंतर खासदार ओवेसींनी केले आहे . आता ओवेसी सभेत योगींना काय उत्तर देतील? हे पाहणे महत्वाचे ठरणार आहे.