चारित्र्यावर संशय घेऊन पत्नीवर धारदार चाकूने वार

0
397

पुणे, दि.११ (पीसीबी) – चारित्र्यावर संशय घेऊन पत्नीवर धारदार चाकूने वार करून पतीने स्वत: विषारी औषध घेऊन आत्महत्येचा प्रयत्न केल्याची धक्कादायक घटना बिबवेवाडीत सोमवारी पहाटे घडली. यामध्ये पती-पत्नीची प्रकृती चिंताजनक असून, त्यांच्यावर ससून रुग्णालयात उपचार सुरू आहेत. 

चित्रा कुंडलिक गाडेकर (वय ४०, रा. श्रेयसनगर, गल्ली क्रमांक नऊ, अप्पर इंदिरानगर, बिबवेवाडी) असे जखमी झालेल्या महिलेचे नाव आहे. या प्रकरणी पती कुंडलिक पांडुरंग गाडेकर (वय ५०) यांच्यावर गुन्हा दाखल करण्यात आला आहे. चित्रा यांची बहीण मंगल धनाजी म्हेत्रे (वय ३२) यांनी बिबवेवाडी पोलिस ठाण्यात तक्रार दिली आहे. पोलिसांनी दिलेल्या माहितीनुसार, कुंडलिक चित्राच्या चारित्र्यवर संशय घेत होता. गेल्या पाच महिन्यांपासून त्यांच्यात वाद सुरू होते. कुंडलिक वेळोवेळी शिवीगाळ करून चित्रा यांना मारहाण करीत होता. रविवारी रात्री चित्रा झोपल्या असता, पहाटे तीनच्या सुमारास कुंडलिकने त्यांना उठवले आणि वाद सुरू केला. त्यानंतर शिवीगाळ करून मारहाण केली. वाद विकोपाला गेल्यानंतर त्याने चाकूने चित्रा यांच्या पोटावर, छातीवर आणि मांडीवर वार केले. चित्रा रक्ताच्या थारोळ्यात पडल्यानंतर

कुंडलिकने विषारी औषध पिऊन आत्महत्या करण्याचा प्रयत्न केला. 

ओरडण्याचा आवाज आल्यानंतर हा प्रकार शेजारी राहणाऱ्यांच्या लक्षात आला. त्यांना तत्काळ चित्रा यांची बहीण मंगल आणि पोलिसांना घटनेची माहिती दिली. माहिती मिळताच बिबवेवाडी पोलिसांनी घटनास्थळी धाव घेतली. दोघांनाही उपचारासाठी ससून रुग्णालयात दाखल केले. दोघांची प्रकृती चिंताजनक असून, दोघांवर उपचार सुरू आहेत. सहाय्यक पोलिस आयुक्त सुनील देशमुख यांनी घटनास्थळी भेट देऊन माहिती घेतली. वरिष्ठ निरीक्षक मुरलीधर करपे तपास करत आहेत.