पिंपरी, दि. १२ (पीसीबी) – लोकसभा निवडणुकीचे नगारे वाजू लागल्यापासून मावळ आणि शिरूर लोकसभा मतदारसंघात राष्ट्रवादीचे उमेदवार कोण असणार याबाबत उत्सुकता निर्माण झालेली आहे. पक्षाने घेतलेल्या आढावा बैठकीत राष्ट्रवादीचे शहराध्यक्ष संजोग वाघेरे आणि ज्येष्ठ नगरसेवक भाऊसाहेब भोईर यांनी मावळमधून लढण्याची इच्छा प्रदर्शित केली आहे. शिरूर लोकसभा मतदारसंघातून लढण्यासाठी भोसरीचे माजी आमदार विलास लांडे इच्छुक असल्याचे या बैठकीत समोर आले. वाघेरे, भोईर, लांडे या तिघांनीही राष्ट्रवादीची उमेदवारी मिळणारच अशा अविर्भावात निवडणुकीची तयारी अद्याप तरी सुरू केलेली नाही. हे तिघेही लोकसभा निवडणुकीसाठी खरोखरच सक्षम उमेदवार आहेत का?, भाजप आणि शिवसेनेने निर्माण केलेल्या आव्हानापुढे राष्ट्रवादीचे हे संभाव्य उमेदवार टिकणार का? हा खरा प्रश्न आहे. याबाबत शहराच्या राजकीय वर्तुळात मतमतांतरे व्यक्त होत आहेत.
