खाऊचे आमिष दाखवून अल्पवयीन मुलाने चार वर्षांच्या चिमुकलीवर बलात्कार

0
452

पुणे, दि. २२ (पीसीबी) – खाऊचे आमिष दाखवून, भाड्याच्या खोलीत राहणाऱ्या एका अल्पवयीन मुलाने इमारतीच्या खाली राहणाऱ्या चार वर्षांच्या चिमुकलीवर जबरदस्तीने बलात्कार केल्याचा धक्कादायक प्रकार येरवड्यात घडला आहे.पोलिसांनी आरोपीवर बलात्काराचा गुन्हा दाखल केला असून आरोपीची बालसुधारणागृहात रवानगी केला आहे.

या प्रकरणी पीडित मुलीच्या आईने पोलिसांत फिर्याद दिली आहे. त्यावरून पोलिसांनी १६ वर्षीय अल्पवयीन मुलाविरोधात बाललैंगिक अपराधापासून संरक्षण (पॉक्सो) कायद्यानुसार बलात्काराचा गुन्हा दाखल केला.

पोलिसांनी दिलेल्या माहितीनुसार, ‘येरवडा परिसरात पीडित मुलगी आई-वडिलांसोबत भाड्याने राहत आहे. वरच्या मजल्यावर आणखीन एक कुटुंबीय भाड्याने राहण्यास आहे. मुलीचे वडील सुरक्षारक्षक असून, आई घरकाम करते. चार वर्षांची पीडित मुलगी शुक्रवारी दुपारी वरच्या मजल्यावर राहणाऱ्या मैत्रिणीसोबत इमारतीच्या टेरेसवर खेळण्यासाठी गेली. मैत्रिणीला झोप आल्याने ती घरी गेली. त्यामुळे पीडित मुलगीही घरी जाण्यासाठी निघाली. या वेळी वरच्या मजल्यावर भाड्याने राहणाऱ्या महिलेच्या भावाने मुलीला खाऊचे आमिष दाखवून, जवळ बोलावून घेतले. तिचे तोंड दाबून खोलीत नेऊन बलात्कार केला. मुलगी जोराने ओरडल्यावर तिला सोडून दिले. मुलगी पळत घरी गेल्यावर तिने रडत आईला झालेला प्रकार सांगितला. पोलिस घटनास्थळी आल्यावर अल्पवयीन मुलाला ताब्यात घेऊन, ‘पॉस्को’अंतर्गत गुन्हा दाखल करण्यात आला.

ओळखीच्या व्यक्तींकडून बलात्कार

पीडित मुलीचे कुटुंबीय येरवड्यात भाड्याने राहण्यास असून, वरच्या मजल्यावर आणखीन एक कुटुंबीय भाड्याने राहतात. त्यामुळे दोन्ही कुटुंबीयांची मुले एकमेकांच्या घरात खेळण्यासाठी जातात. वरच्या मजल्यावर राहणाऱ्या महिलेचा भाऊ आरोपी हा शिक्षणासाठी बीडला असतो. अधूनमधून येरवड्यात येत असल्याने सर्व जण त्याला ओळखतात. मात्र, शुक्रवारी त्याने पीडित मुलीला खाऊचे आमिष दाखवून, बलात्कार केला. त्यामुळे ओळखीच्या व्यक्तींकडूनच बलात्काराच्या घटना घडत असल्याचे पुन्हा एकदा अधोरेखित झाले आहे. त्यामुळे पालकांनी मुलांवर विशेष लक्ष देण्याची नितांत गरज आहे.