पिंपरी, दि. १८ (पीसीबी) – पिंपरी-चिंचवडमध्ये गेली १५ वर्षे राष्ट्रवादीच्या विरोधात संघर्ष करणाऱ्या काँग्रेसवर आज राष्ट्रवादीचेच काम करण्याची वेळ आली आहे. कधी काळी माजी उपमुख्यमंत्री अजितदादा पवार यांनी “औद्योगिकनगरीत औषधालाही काँग्रेसला शिल्लक ठेवणार नाही, अशी भीमगर्जना केली होती. तशी राजकीय स्थितीही त्यांनी निर्माण केली. अजितदादांच्याच कृपेने शहरात शून्य राजकीय अस्तित्व असलेल्या काँग्रेसची आज राष्ट्रवादीला गरज आहे. परंतु, काँग्रेसच्या एकाच गटाला विश्वासात घेत राष्ट्रवादीने लोकसभेसाठी जुळवाजुळव केली असली, तरी काँग्रेसमधील दुसरा गट राष्ट्रवादीवर नाराज असल्याची चर्चा राजकीय वर्तुळात आहे.
