भोपाळ, दि. १२ (पीसीबी) – काँग्रेसने मध्यप्रदेशात सरकार स्थापनेचा दावा केला आहे. काँग्रेसच्या शिष्टमंडळाने आज राज्यपाल आनंदीबेन पटेल यांची भेट घेऊन त्यांच्याकडे १२१ आमदारांच्या पाठिंब्याचे पत्र दिले. तसेच काँग्रेसला सत्ता स्थापन करण्यासाठी पाचारण करण्याची विनंतीही केली.
काँग्रेसचे नेते कमलनाथ, ज्येष्ठ नेते दिग्विजय सिंह आणि ज्योतिरादित्य सिंधिया यांनी आज राज्यपाल आनंदीबेन पटेल यांची भेट घेऊन १२१ आमदारांच्या पाठिंब्याची यादी दिली. या यादीनुसार बसपाच्या दोन, सपाच्या एका आणि ४ अपक्षांचा पाठिंबा आपल्याला असल्याचे काँग्रेसने म्हटले आहे. आम्ही सरकार स्थापन करण्याचा दावा केला आहे. आमच्याकडे १२१ आमदारांचे पाठबळ आहे, असे काँग्रेस नेते नरेंद्र सलुजा यांनी सांगितले. दरम्यान, मध्यप्रदेशातील मुख्यमंत्रीपदाबाबतचा सस्पेन्स अद्याप कायम आहे. काँग्रेसने अद्यापही त्याबाबत कोणतीही प्रतिक्रिया न दिल्याने कमलनाथ आणि सिंधिया समर्थकांनी आपआपल्या नेत्यांच्या समर्थनार्थ जोरदार घोषणाबाजी केली. मुख्यमंत्री शिवराज सिंह चौहान यांनी आज दुपारी राज्यपालांची भेट घेऊन राजीनामा दिला आहे. तर काँग्रेस नेते कमलनाथ आज दुपारी शिवराज सिंह यांना भेटणार असल्याचे वृत्त आहे.
