पिंपरी, दि. 29 (पीसीबी) : महाराष्ट्र राज्याचे कामगार नेते व राष्ट्रीय श्रमिक आघाडीचे संस्थापक अध्यक्ष यशवंतभाऊ भोसले यांची नॅशनल फेडरेशन ऑफ इंडीयन ट्रेड युनियन या संघटनेच्या राष्ट्रीय कार्यकारणीमध्ये वरिष्ठ उपाध्यक्ष म्हणुन निवड करण्यात आली आहे.
एनएफआयटीयु चे राष्ट्रीय अध्यक्ष डॉ. दीपक जयस्वाल यांनी या निवडीबाबतची घोषणा नवी दिल्ली येथे केली. एनएफआयटीयु ही केंद्र शासनमान्य संघटना आहे. या संघटनेच्या वरिष्ठ उपाध्यक्षपदी निवड झाल्यामुळे देशातील असंघटीत, संघटीत अशा पन्नास कोटीच्यावर असलेल्या कामगारांच्या प्रश्नांकरीता संसदेच्या श्रम मंत्रालयनिगडीत कामगार कायदे पुनर्गठन समीती, देशभरांत असलेल्या अडतीस कोटी असंघटीत कामगारांसाठी काम करणारी वेतन समिती, देशभरातील संघटीत, असंघटीत कामगारांसाठी आर्थिक तरतुद करणारी व कामगार हितासाठी विविध उपक्रम राबविणारी संसदीय स्थायी समिती (कामगार), कामगारांसाठी देशभरात विविध कल्याणकारी काम करणारे विविध बोर्ड या सर्व ठिकाणी एनएफआयटीयु या संघटनेच्या वतीने प्रतिनीधी या नात्याने काम पाहण्याची संधी आता यशवंतभाऊ भोसले यांना मिळणार आहे. त्याचबरोबर अंतरराष्ट्रीय स्तरावर काम करणार्‍या कामगार संघटनेतही भारतीय श्रमिकांच्या भुमीका मांडण्याची संधी यशवंतभाऊ यांना प्राप्त होणार आहे.
केंद्र शासनाने देशीरातील केवळ चौदा कामगार संघटनांना मान्यता दिली असून एनएफआयटीयु ही त्या पैकी एक महत्वपूर्ण संघटना आहे. संघटनेच्या वरिष्ठ उपाध्यक्षपदी यशवंतभाऊ भोसले यांची निवड झाल्यानंतर यासंदर्भात संघटनेचे राष्ट्रीय अध्यक्ष डॉ. दीपक जयस्वाल यांनी देशाचे पंतप्रधान नरेंद्रजी मोदी, केंद्रीय श्रम मंत्री भुपेंद्रसींह यादव, राज्यातील सर्व मुख्यमंत्री, महाराष्ट्राचे कामगार मंत्री तसेच अंतरराष्ट्रीय कामगार संघटनेचे डायरेक्टर यांना पत्र पाठवून कळविले असून राष्ट्रीय व अंतरराष्ट्रीय स्तरावर नोंद घेण्यास कळविण्यात आले आहे.
