पिंपरी, दि. २१ (पीसीबी) – लोकसभा निवडणुकीच्या निकालानंतर पिंपरी-चिंचवड महापालिकेच्या राजकारणात अनेक उलथापालथी होण्याची चर्चा राजकीय वर्तुळात आहे. सत्तारूढ भाजपचे पक्षनेते एकनाथ पवार, विरोधी पक्षनेते दत्ता साने आणि शिवसेनेचे गटनेते राहुल कलाटे यांच्या पदावर गंडांतर येण्याची शक्यता आहे. एक वर्षांचा कार्यकाळ पूर्ण झाल्याने दत्ता साने यांना विरोधी पक्षनेतेपद सोडावे लागू शकते. दुसरीकडे सत्तारूढ पक्षनेते एकनाथ पवार हे निष्क्रिय ठरल्यामुळे पक्षातूनच त्यांना विरोध होत आहे. त्यामुळे विधानसभा निवडणुकीआधी किंवा नंतर सत्तारूढ पक्षनेतेपदी भाजपकडून दुसऱ्या नगरसेवकाला संधी मिळू शकते. तसेच शिवसेनेचे गटनेते राहुल कलाटे यांनी स्वतःबाबत पक्षात अविश्वासाचे वातावरण निर्माण केले आहे. त्यामुळे मातोश्रीकडून नवीन गटनेता निवडीची केवळ औपचारिकता बाकी असल्याचे समजते.