पिंपरी, दि. ११ (पीसीबी) – शिरूर लोकसभा मतदारसंघातून खासदार होण्याच्या प्रबळ इच्छेने आमदार महेश लांडगे यांनी गेली दोन-तीन वर्षे चाचपणी चालवली होती. प्रसंगी त्यांनी विद्यमान शिवसेना खासदार शिवाजीराव आढळराव पाटील यांना अंगावरही घेतले. परंतु, गेल्या काही महिन्यांपासून आमदार लांडगे हे खासदारकीसाठी इच्छुक नसल्याचे चित्र मतदारसंघात निर्माण होऊ लागले आहे. त्यातच भोसरीचे राष्ट्रवादीचे माजी आमदार विलास लांडे हे शिरूरमधून पुन्हा लढण्यासाठी इच्छुक असल्याचे पुढे आल्याने आमदार लांडगे हे आगामी निवडणुकीत शिरूरच्या मैदानात नसतीलच अशी अटकळ बांधली जात आहे. लांडगे आणि लांडे यांच्यात पॅचअप होणार असल्याच्या बातम्याही समोर येत आहेत. आमदार लांडगे यांच्या या “यू टर्न”मुळे शिवसेना खासदार शिवाजीराव आढळराव पाटील यांचा शिरूर मतदारसंघावर तिसऱ्यांदा भगवा फडकवण्याचा मार्ग आणखी सोपा होणार आहे.
