मुंबई, दि. ४ (पीसीबी) – लोकसभा निवडणुकीत काँग्रेस-राष्ट्रवादी काँग्रेसमध्ये सर्वाधिक जागा कोणत्या पक्षाला मिळतील, याचे अंदाज बांधले जाऊ लागले आहेत. राष्ट्रवादीच्या गोटात तुलनेने उत्साहाचे वातावरण असताना काँग्रेसमध्ये मात्र शंकेची पाल चुकचुकत आहे. भाजप आणि शिवसेनेत भाजप हाच मोठा भाऊ असेल असे भाजपने अधोरेखित केले आहे. औसा आणि मुंबईतील संयुक्त जाहीर सभांमध्ये पंतप्रधान नरेंद्र मोदी यांनी शिवसेना पक्षप्रमुख उद्धव ठाकरे यांचा आपले छोटे बंधू, असा उल्लेख केला होता. यावरून भाजप हाच मोठा भाऊ असल्याचा संदेश मोदी यांनी दिला होता. आता काँग्रेस-राष्ट्रवादीत मोठा भाऊ कोण असेल, याची चर्चा सुरू झाली आहे.