राष्ट्रवादीचे अध्यक्ष शरद पवारांच्या हत्येचा कट, पुणे पोलिसांकडे तक्रार दाखल

109

पुणे,दि.८(पीसीबी) – राष्ट्रवादी काँग्रेसचे कार्यकर्ते लक्ष्मीकांत खांबिया यांनी राष्ट्रवादी काँग्रेसचे अध्यक्ष शरद पवार यांच्या जीवाला धोका असल्याची लेखी तक्रार पुण्यातील शिवाजीनगर पोलीस स्टेशनला दिली आहे. काही वेबपोर्टलवरुन शरद पवार यांच्याविरोधात चिथावणीखोर भाषणांचे व्हिडीओ टाकले जात आहेत. त्याखाली शरद पवार यांच्याविरोधात टोकाच्या कमेंट केल्या जात आहेत. या कमेंटवरुन शरद पवार यांच्या हत्येचा कट रचला जात असल्याचा आरोप लक्ष्मीकांत खांबिया यांनी केला आहे.

पुणे पोलिसांकडे शरद पवार यांच्या जीवाला धोका असल्याची तक्रार दाखल झाली आहे त्यामुळे एकच खळबळ उडाली आहे. शिवाजीनगर पोलीस ठाण्यात ही तक्रार दाखल झाली आहे. या तक्रारीतून आरोपींवर कारवाईची मागणी करण्यात आली आहे.

दरम्यान, सोशल मीडियात सातत्यानेच शरद पवार यांच्यावर जोरदार टीका होत असते. यात चिथावणीखोर भाषाही वापरली जाते. याची दखल घेऊन तातडीने अशा कमेंट करणाऱ्यांवर कठोर कारवाई करावी, अशी मागणी लक्ष्मीकांत खांबिया यांनी केली आहे.