राज्यसभेसाठी १० जून ला निवडणूक

22

– संजय राऊत, पायूष गोयल, विनय सहस्त्रबुद्धे यांची मुदत संपली

नवी दिल्ली, दि. १२ (पीसीबी) : महाराष्ट्रातील राज्यसभेचे शिवसेना खासदार संजय राऊत, भाजपचे राज्यसभा खासदार पियूष गोयल, विकास महात्मे, विनय सहस्त्रबुद्धे, राष्ट्रवादीचे प्रफुल पटेल आणि काँग्रेसचे पी.चिदंबरम यांच्या ६जागांसह राज्यसभेच्या रिक्त होणाऱ्या ५७ जागांसाठीचा द्वीवार्षिक निवडणूक कार्यक्रम जाहीर झाला आहे. येत्या १० जून रोजी राज्यसभेच्या ५७ जागांसाठी निवडणूक होणार आहे. उत्तर प्रदेशमधून सर्वाधिक ११, महाराष्ट्र आणि तामिळनाडूमधून प्रत्येकी ६, बिहारमधून ५ आणि राजस्थान आणि कर्नाटकमधून ४-४ जागांवर निवडणूक होणार आहे. २४ मे रोजी ५७ जागांसाठी निवडणुकीची अधिसूचना जारी करण्यात येणार असल्याचे निवडणूक आयोगाने सांगितले आहे.

महाराष्ट्रातल्या राज्यसभेच्या जागांसाठी १० जूनला मतदान, राऊतांसह ६ जणांची मुदत संपली
येत्या तीन महिन्यांत रिक्त होणाऱ्या जागांसाठाचा देखील निवडणुकीचा कार्यक्रम आज जाहीर करण्यात आला. राज्यसभेतून निवृत्त होणाऱ्या सदस्यांमध्ये केंद्रीय मंत्री मुख्तार अब्बास नक्वी, पीयूष गोयल, निर्मला सीतारामन, काँग्रेसच्या अंबिका सोनी, जेडीयूचे केसी त्यागी अशा दिग्गज नेत्यांचा समावेश आहे. आज (गुरुवारी) राज्यसभेत या सदस्यांच्या निरोपाचा औपचारिक सोहळा पार पडणार होता. मात्र भाजपचे राज्यसभेचे खासदार प्रवीण राष्ट्रपाल यांच्या निधनाचे वृत्त राज्यसभेत येताच राज्यसभेने दिवंगत सदस्याला श्रद्धांजली अर्पण करून सभा तहकूब केली.

राऊतांसह महाराष्ट्रातून ६ जागा रिक्त
पियुष गोयल (भाजप)
पी चिदंबरम (काँग्रेस)
प्रफुल्ल पटेल (राष्ट्रवादी काँग्रेस)
विकास महात्मे (भाजप)
संजय राऊत ( शिवसेना)
विनय सहस्त्रबुद्धे (भाजप)

राज्यसभेच्या ५७ जागा या १५ राज्यांमधील आहेत. महाराष्ट्र, उत्तर प्रदेश, तामिळनाडू, आंध्रप्रदेश, तेलंगाणा, छत्तीसगड, पंजाब, मध्यप्रदेश, कर्नाटक, ओडिशा, राजस्थान, उत्तराखंड, बिहार , झारखंड आणि हरियाणा राज्यांतील जागांचा त्यामध्ये समावेश आहे.

राज्यसभेत एकूण संख्याबळ २३८ आणि राष्ट्रपती नियुक्त १२ अशा २५० जागा असतात. सध्या राज्यसभेच्या २४५ जागा आहेत. महाराष्ट्रातून राज्यसभेवर १९ जागा निवडून दिल्या जातात.