मायावतींचा बसपा सर्वात श्रीमंत राजकीय पक्ष; बँकांमध्ये ६६९ कोटी जमा

100

नवी दिल्ली, दि. १५ (पीसीबी) – बँक खात्यांमधील शिलकीच्या बाबतीत मायावती यांच्या बहुजन समाज पक्षानं (बसप) अन्य सर्व राष्ट्रीय आणि प्रादेशिक पक्षांना मागं टाकलंय. बसपनं निवडणूक आयोगाला २५ फेब्रुवारी रोजी दिलेल्या माहितीनुसार, एनसीआरमधील सरकारी बँकांच्या एकूण आठ खात्यांमध्ये पक्षाचे तब्बल ६६९ कोटी रुपये जमा आहेत.

बसपकडे ९५.५४ लाख रुपये रोकड आहे. तर दुसरीकडे मित्रपक्ष असलेला समाजवादी पक्ष शिलकीच्या बाबतीत दुसऱ्या स्थानी आहे. त्यांच्या विविध बँक खात्यांमध्ये ४७१ कोटी रुपये आहेत. मध्य प्रदेश, छत्तीसगड, राजस्थान आणि तेलंगणमध्ये नुकत्याच झालेल्या विधानसभा निवडणुकांदरम्यान बँकांमधील शिल्लक ११ कोटी रुपयांनी घटली आहे. काँग्रेस बँक शिलकीच्या बाबतीत तिसऱ्या स्थानी आहे. या पक्षाकडे १९६ कोटी रुपये शिल्लक आहे. ही माहिती गेल्या वर्षी २ नोव्हेंबरला निवडणूक आयोगाला दिलेल्या माहितीच्या आधारे दिली आहे. चौथ्या स्थानी तेलगू देसम पक्ष आणि पाचव्या स्थानी भाजप आहे. तेलगू देसम पक्षाकडे १०७ कोटी आणि भाजपकडे ८२ कोटी रुपये शिल्लक आहे.