पुणे विमानतळ जगभरात तिसऱ्या स्थानावर

1737

पुणे, दि. १४ (पीसीबी – प्रवासी सुविधांबाबत पुण्याच्या विमानतळाला पुन्हा एकदा आंतरराष्ट्रीय स्तरावर गौरविण्यात आले आहे. एअरपोर्ट कौन्सिल ऑफ इंटरनॅशनलच्या (एसीआय) कॅनडा येथे झालेल्या परिषदेत जगभराती प्रवासी सेवेत सर्वोत्तम असलेल्या विमानांची यादी जाहीर करण्यात आली. त्यात ५० लाख ते दीड कोटी प्रवासी संख्या असलेल्या विमानतळांच्या गटात पुणे विमानतळाने जगभरातील तिसरे स्थान पटकाविले आहे. पुण्यासह कोलकाता विमानतळही तिसऱ्या स्थानावर आहे.

एअरपोर्ट सर्व्हिस क्वॉलिटी (एएसक्यू) अॅवॉर्ड्स २०१८ अंतर्गत कोट्यावधी प्रवाशांनी नोंदविलेल्या मतांनुसार ‘एसीआय’ने हे रेटिंग गुरूवारी जाहीर केले. ‘एसीआय’च्या व्यापारी संस्थेशी १७६ देशातील १९५३ विमानतळ सभासद आहेत. टर्मिनलपासून विमानतळाला जाण्याचा मार्ग, सुरक्षा विषयक तपासणी, प्रवाशांना दिल्या जाणाऱ्या सुविधा, विश्रांतीगृह, स्टोअर्स, रेस्टॉरंट आदी प्रवासी सुविधेच्या विविध ३४ कॅटेगरीनुसार या विमानतळांवर सर्वेक्षण केले जाते. यंदा ‘एसीआय’च्या सर्व्हेमध्ये ‘एशिया-पॅसिफिक’ गटातून भारतातील पुणे, लखनौ, चेन्नई, कोलकाता , अहमदाबाद आणि इंदूर या सहा विमानतळांचा समावेश आहे. गेल्या वर्षी (२०१७) झालेल्या सर्वेक्षणामध्ये ५० लाख ते दीड कोटी प्रवासी क्षमतेच्या विमानतळ गटामध्ये हैदराबाद दुसऱ्या स्थानी होते. तर, कोची, कोलकाता आणि पुणे विमानतळ संयुक्तपणे तिसऱ्या स्थानावर होते. यंदाही पुण्याने तिसरे स्थान कायम ठेवले आहे. गेल्या वर्षी आशिया खंडामध्ये गेल्या वर्षाच्या तुलनेत सर्वांत सुधारलेले विमानतळ म्हणून अहमदाबाद विमानतळाला गौरविण्यात आले होते. यंदा अहमदाबाद विमानतळाने २० लाख ते ५० लाख प्रवासी गटात अहमदाबादने क्रमांक पटकाविला आहे.