जम्मू-काश्मिर: शोपियांमध्ये चकमकीत दहशतवादी ठार

18

श्रीनगर, दि. १० (पीसीबी) – जम्मू-काश्मीरमधील शोपियां जिल्ह्यात आज पहाटे दहशतवादी आणि सुरक्षा दला दरम्यान झालेल्या चकमकीत एक दहशतवादी ठार झाला आहे. या हल्ल्यात दोन जवान जखमी झाले आहेत. दरम्यान, शोपियांमधील कुमदलान परिसरात आणखी ५-६ अतिरेकी लपल्याची शक्यता वर्तवण्यात येत असून अधिक तपास सुरू आहे.

शोपियां जिल्ह्यातील कुमदलान येथे काही अतिरेकी लपल्याची खबर लागल्यानंतर सुरक्षा दलाच्या जवानांनी तात्काळ घटनास्थळी पोहचून सर्च ऑपरेशन सुरू केले. यावेळी अतिरेक्यांनी जवानांच्या दिशेने गोळीबार केला. त्याला प्रत्युत्तर देताना झालेल्या चकमकीत एक अतिरेकी ठार झाला आहे. दरम्यान, अतिरेकी आणि सुरक्षा दलादरम्यान भीषण गोळीबार सुरू असल्याने सुरक्षा दलाच्या जवानांनी स्थानिक नागरिकांना सुरक्षित स्थळी हटविण्यास सुरुवात केली आहे. त्यातच काही समाजकंटकांनी सुरक्षा दलाच्या जवानांवर दगडफेक सुरू केली होती. त्यामुळे या सर्च ऑपरेशनमध्ये अडथळे निर्माण होत होते. या संपूर्ण परिसरात लष्कराच्या ३४ राष्ट्रीय रायफल्सचे जवान, सीआरपीएफ जवान आणि पोलीस तैनात ठेवण्यात आले आहे. शोपियांच्या बेमनीपुरा परिसरालाही लष्कराने वेढा घातला आहे.