आयआयटीच्या विद्यार्थ्याने म्हणून केली आत्महत्या

67

मुंबई, दि. १७ (पीसीबी) : देशातील प्रतिष्ठीत शैक्षणिक संस्थेपैकी एक असलेल्या आयआयटी मुंबईत शिकणाऱ्या एका विद्यार्थ्याने आत्महत्या केल्याची घटना उघडकीस आली आहे. वसतिगृहाच्या सातव्या मजल्यावरून उडी मारून त्याने जीवन संपवले. मिळालेल्या माहितीनुसार, पहाटे साडेचार वाजताच्या सुमारास विद्यार्थ्याने आत्महत्या केली.

आत्महत्या करणारा विद्यार्थी हा मास्टर्सच्या दुसऱ्या वर्षात शिकत होता, अशी माहिती मिळाली आहे. त्याने वसतिगृहाच्या सातव्या मजल्यावरून उडी मारली. त्याला तात्काळ मुंबईतील राजावाडी रुग्णालयात दाखल करण्यात आले होते. तिथे डॉक्टरांनी त्याला मृत घोषित केले. मृत विद्यार्थ्याचे वय २७ वर्षे असल्याचे कळते. या घटनेची माहिती मिळताच पोलीस तिथे पोहोचले. त्यांना घटनास्थळावरून एक सुसाइड नोट सापडली आहे. त्याने नैराश्येतून हे पाऊल उचलले असल्याची माहिती मिळाली आहे. त्याच्यावर उपचारही सुरू होते. विद्यार्थ्याने त्याच्या आत्महत्येला कुणालाही जबाबदार ठरवलेले नाही, असे सुसाइड नोटमधून स्पष्ट झाले आहे.

१२२ विद्यार्थ्यांनी केलीय आत्महत्या
संसदेच्या अधिवेशनादरम्यान शिक्षण मंत्री धर्मेंद्र प्रधान यांनी सांगितले होते की, आयआयटी, आयआयएम, केंद्रीय विश्वविद्यालये, आयईएससी आणि अन्य उच्च शिक्षण संस्थांमध्ये सन २०१४ पासून सन २०२१ या कालावधीत १२२ विद्यार्थ्यांनी आत्महत्या केल्या आहेत. त्यातील अनुसूचित जाती या प्रवर्गातील २४ विद्यार्थी, अनुसूचित जमातीमधील ३ विद्यार्थी, इतर मागास प्रवर्गातील ४१ विद्यार्थी आणि अल्पसंख्याक प्रवर्गातील तीन विद्यार्थ्यांचा समावेश आहे. याच कालावधीत आयआयटीमधील ३४ विद्यार्थी, आयईएममधील पाच विद्यार्थी, आयआएससीमधील नऊ विद्यार्थी, केंद्रीय विश्वविद्यालयांमधील ३७ आणि इतर शैक्षणिक संस्थांमधील ३४ विद्यार्थ्यांनी आत्महत्या केल्या आहेत.